Saturday, September 13, 2008

പറയാതിരുന്ന സത്യങ്ങള്‍

ഒരു മേശവലിപ്പ് നിറയെ
പറയാതിരുന്ന സത്യങ്ങളാണ്


കാഴ്ച്ച നഷ്ടപെട്ട കണ്ണുകളെ ഓമനിക്കുന്ന അന്ധയെപോലെ
ഞാനവയെ സ്പര്‍ശിക്കുന്നു.


കനലുകള്‍ എന്നെന്നേക്കും സ്മരണയായൊരു
അടുപ്പിന്റെ തണുപ്പില്‍ അസ്വസ്ഥയാകുന്ന
കുറുഞ്ഞിയെപ്പോലെ ഹൃദയം കരയുന്നു.

ഒരിക്കലവ അറബികഥകളിലെ മന്ത്രങ്ങളാ‍യിരുന്നു
എനിക്ക് ഒരായിരം മാന്ത്രികലോകങ്ങള്‍ തുറക്കാന്‍ കഴിയുമായിരുന്നു;

എന്നാലിന്നവ തുടലുകളാണ്
എന്റെ കവിളുകളില്‍ മുലകളില്‍ തുടകളില്‍
അവ മുറിവേല്‍പ്പിക്കുന്നു.
മുറിഞ്ഞു വീഴുന്ന മാംസകഷണങ്ങള്‍
നഷ്ടങ്ങളുടെ വീഞ്ഞ്‌ഭരണിയില്‍ മുന്തിരികളാകുന്നു.


പറയാതിരുന്ന ഓരോ സത്യവും ഒരു ബാദ്ധ്യതയാണ്.
ബാദ്ധ്യതകളുടെ മുള്ളുകള്‍ ഹൃദയത്തിന്റെ മേശവലിപ്പില്‍

ആനന്ദത്തോടെ സൂക്ഷിക്കുന്ന ഞാന്‍
ഒരു മാനസികരോഗിയാണ്
രോഗത്തില്‍ ആസക്തയും

രോഗവുമൊത്തെന്റെ രാസലീലകളെ
നിലവിളി എന്നു പേരിട്ടുവിളിക്കാതിരിക്കുക.

6 comments:

പൂജ്യം സായൂജ്യം said...

ഒരു മേശവലിപ്പ് നിറയെ
പറയാതിരുന്ന സത്യങ്ങളാണ്

കാഴ്ച്ച നഷ്ടപെട്ട കണ്ണുകളെ ഓമനിക്കുന്ന അന്ധയെപോലെ
ഞാനവയെ സ്പര്‍ശിക്കുന്നു.

പി എം അരുൺ said...

പറയാതിരുന്ന ഓരോ സത്യവും ഒരു ബാദ്ധ്യതയാണ്.
ബാദ്ധ്യതകളുടെ മുള്ളുകള്‍ ഹൃദയത്തിന്റെ മേശവലിപ്പില്...................
aa mesavalippinu theeyidoo..........jeevitham enjoy cheyyaanullathanu

മാംഗ്‌ said...

മരഞ്ഞിരിക്കുന്ന സത്യങ്ങളെക്കാൾ മറച്ചുവയക്കുന്ന സത്യങ്ങളാണു കൂടുതൽ.
നന്നായിരിക്കുന്നു.....

Anonymous said...

പറയാതിരുന്ന ഓരോ സത്യവും ഒരു ബാദ്ധ്യതയാണ്.
പറയുന്ന ഓരോ സത്യവും ഒരു വേദനയാണ്.
ഇഷ്ടമായി, ത്രസിപ്പിക്കുന്ന സൃഷ്ടിയായി വരിയായി
വാക്കായി അക്ഷരങ്ങളായി നിറയുന്നു.
അക്ഷരങ്ങള്‍ ഉപയോഗിക്കാനുള്ളവയാണ്, പിച്ചിചീന്താനുള്ളവയാണ്.
അഭിനന്ദനങള്‍.

Unknown said...

valare nannayirikkunnu.........

Dhanyashree said...

:)